Showing posts with label religion news. Show all posts
Showing posts with label religion news. Show all posts

Saturday, September 24, 2022

வல்லிபுர ஆழ்வார் கொடியேற்றம்..!!!(Video)

வல்லிபுர ஆழ்வார் கொடியேற்றம்..!!!(Video)


வரலாற்று சிறப்பு மிக்க வடமராட்சி அருள்மிகு ஸ்ரீ வல்லிபுர ஆழ்வார் திருக்கோவில் வருடாந்த பெருந் திருவிழா இன்றைய தினம் சனிக்கிழமை காலை 8.45 மணியளவில் கொடியேற்றத்துடன் ஆரம்பமானது.

தொடர்ந்து மகோற்சவ திருவிழாக்கள் இடம்பெறவுள்ள நிலையில் எதிர்வரும் 7ஆம் திகதி சப்பரத்திருவிழாவும் , மறுநாள் 08ஆம் திகதி தேர்த்திருவிழாவும் 09ஆம் திகதி சமுத்திர தீர்த்த திருவிழாவும் இடம்பெறவுள்ளது.



















Thursday, September 22, 2022

புரட்டாசி மாதத்தில் இதை மட்டும் கட்டாயமாக செய்யவே கூடாது. மீறி செய்தால் பித்ரு தோஷத்திற்கு ஆளாகி விடுவோம்..!!!

புரட்டாசி மாதத்தில் இதை மட்டும் கட்டாயமாக செய்யவே கூடாது. மீறி செய்தால் பித்ரு தோஷத்திற்கு ஆளாகி விடுவோம்..!!!


ஒவ்வொரு சுப காரியங்களை செய்வதற்கும் நாள், கிழமைகள் பார்த்து தான் செய்வோம். அதே போல ஒரு சில மாதங்களில் எந்த ஒரு சுப நிகழ்ச்சிகளையும் செய்ய மாட்டார்கள். ஆடி மாதம், மார்கழி மாதம், புரட்டாசி மாதமும் அதில் அடங்கும். பொதுவாக புரட்டாசியில் வீடு பால் காய்ச்சுவது, திருமணம் போன்று பெரிய சுப நிகழ்ச்சிகள் எதையும் நிச்சயமாக செய்யக்கூடாது. இது ஓரளவிற்கு நாம் அனைவருக்கும் தெரிந்த ஒன்று தான். இந்த மாதம் சுபகாரியம் செய்யக்கூடாது என பலரும் சொல்லி இருந்தாலும், ஏன் செய்யக்கூடாது என்பதை இந்த பதிவில் தெரிந்து கொள்ளலாம்.

புரட்டாசி மாதத்தில் தான் பெரிய அமாவாசை எனப்படும் மகாளய அமாவாசை வரும். ஆகையால் இந்த மாதம் தொடக்கத்திலிருந்து முதல் பதினைந்து நாட்கள் மகாளய பட்ச நாளாக வரும். அதாவது நாம் வீட்டின் இறந்த முன்னோர்களுக்கு நாம் செய்ய வேண்டிய பித்ரு கடமைகளை இந்த முதல் பதினைந்து நாட்களில் செய்ய வேண்டும். விண்ணுலகில் இருந்து அவர்கள் நம்மை தேடி வந்து நாம் படைக்கும் படையலை உண்டு, நமக்கான ஆசீர்வாதங்களை தரும் நாட்களே இந்த மகாளய பட்சம். இந்த நாட்களில் நாம் அவர்களுக்குத்தான் முக்கியத்துவம் கொடுக்க வேண்டும். இதுபோன்ற சுபகாரியங்களை வைத்தால் அவர்களுக்கு செய்ய வேண்டிய பணியை நாம் முழுமையாக செய்ய முடியாது. இதனால் நாம் பித்ரு தோஷத்திற்கு ஆளாகி விடுவோம். தீராத துன்பத்தை தரக்கூடிய பித்ரு தோஷத்தில் இருந்து நம்மை காக்கவே முன்னோர்கள் இந்த மகாளய பட்ச நாட்கலில் சுப காரியங்கள் எதுவும் செய்ய கூடாது என்று சொல்லி இருக்கிறார்கள்.

மகாளய பட்ச நாட்கள் முடிந்ததும் செய்யலாமே என்றால், அதற்கு அடுத்து வரும் பதினைந்து நாட்கள் கொலு வைக்கும் நாட்களாக நமக்கு வந்து விடும். இந்த நாட்களில் நாம் தெய்வங்களை பூஜையில் அமர வைத்து வணங்கி அவர்களின் ஆசீர்வாதங்களையும் அனுகிரகங்களையும் பெற பூஜை புனஸ்காரங்களை நம் வீட்டில் தொடர்ந்து செய்ய வேண்டும். ஆகையால் இந்த நாட்களிலும் இது போன்று சுப காரியங்களில் நாம் கவனம் செலுத்தினால் கடவுளை வணங்குவதை நாம் தவற விட்டு விடுவோம். எனவே தான் இந்த பதினைந்து நாட்களும் நாம் சுப காரியங்கள் எதுவும் செய்ய கூடாது என்று நம் பெரியவர்கள் சொல்லி இருக்கிறார்கள்.

இந்த புரட்டாசி மாதத்தில் சுப காரியங்களை செய்யக்கூடாது என்று கூறியதற்கு காரணம் இவை மட்டுமே. ஆனால் எது குறித்து உண்மை தெரியாத பலரும் புரட்டாசி மாதமே நல்ல மாதம் இல்லை. இந்த மாதங்களில் நாம் எதை செய்தாலும் நமக்கு நல்லது இல்லை என்று பொதுவான ஒரு கருத்தை சொல்லி விட்டார்கள்.

இதிலும் சில விதி விலக்குகள் நமக்காக சொல்லி இருக்கிறார்கள். அதாவது வளைகாப்பு, நிலை வாசல் வைத்தல், காது குத்துதல் போன்ற சிறு சிறு சுப காரிங்களை இந்த புரட்டாசி மாதத்தில் செய்து கொள்ளலாம். ஏனெனில் இவை அந்தந்த மாதங்களில் கட்டாயம் செய்யப்பட வேண்டிய ஒன்றாக இருக்கும். அதாவது ஒன்பதாவது மாதம் செய்ய வேண்டிய வளைகாப்பை பத்தாம் மாதம் செய்ய முடியாது. இந்த மாத கணக்கை கொண்டு செய்யப்படும் சுப காரியங்களை செய்து கொள்ளலாம். அது மட்டும் இல்லாமல் இதனால் பெருமளவு நமது பூஜைகள், பித்ரு கடமைகள் பாதிக்காது. இந்த காலத்தில் பூமி பூஜை போடுவது, புது வீடு கிரகப்பிரவேசம் செய்வது, திருமணம் போன்ற பெரிய சுப நிகழ்ச்சிகள் எதையும் செய்யாமல் இருப்பது நமக்கும் நம் சந்ததியினருக்கும் நன்மை தரும்.

இந்த புரட்டாசி மாதம் முழுவதும் சைவ உணவுகளை மட்டும் சாப்பிட்டு இறை வழிபாடு செய்ய வேண்டும் என நாம் முன்னோர்கள் சொன்ன காரணம் இந்த மாதம் முதல் நமக்கு பருவ நிலை மாற்றங்கள் தொடங்கும். இந்த சமயத்தில் நாம் அசைவ உணவை அதிக அளவில் எடுத்து கொண்டால் அது நம் உடல் நலத்திற்கு தீங்கை தான் ஏற்படுத்தும். நோய்கள் வராமல் தடுக்கவும் தான் இவைகளை நம் முன்னோர்கள் கடைபிடிக்க சொல்லி இருக்கிறார்கள்.

மூலம் -  Dheivegam.com
நவராத்திரி விரதம் ஏன் கொண்டாடப்படுகிறது: அதன் மகத்துவம் என்ன?

நவராத்திரி விரதம் ஏன் கொண்டாடப்படுகிறது: அதன் மகத்துவம் என்ன?


கல்வி, செல்வம், வீரம் என மூன்று சக்திகளை கொண்ட தேவியர்களை நோக்கி அனுஷ்டிக்கும் விரதங்களில் ஒன்று தான் நவராத்திரி விரதம்.

இது புரட்டாதி மாதத்தில் சூரியன் கன்னி இராசியில் சஞ்சரிக்கும் காலத்தில் சக்தியை தேவியைக் குறித்து நோற்கப்படும் விரதமாக கருதப்படுகின்றது.

நவராத்திரி விரத அனுஷ்டிப்புகள்

2022-ம் ஆண்டு நவராத்திரி விழாவானது, செப்டம்பர் 26-ம் திகதி தொடங்கி அக்டோபர் 5-ம் திகதியில் முடிகிறது.

பார்வதியை முதல் 3 நாட்களும், அடுத்து லட்சுமியை 3 நாட்களும், இறுதி 3 நாட்கள் சரஸ்வதியையும் 10-வது நாள் விஜய சாமுண்டீஸ்வரியாக வணங்க வேண்டும்.

அந்தவகையில் நவராத்திரி சிறப்பும், மகத்துவமும் என்ன என்பதை தெரிந்து கொள்வோம்.

நவராத்திரி என்றால் என்ன?

நவராத்திரி பண்டிகையின் முக்கிய நோக்கமே, நாம் எல்லோரும் ஒன்றே, அனைத்தும் இறைசக்தியின் வடிவமே என்று உணர்த்துவது தான்.

துர்க்கா, லட்சுமி, சரஸ்வதி ஆகிய மூன்று இறைசக்திகளும் ஒன்று சேர்ந்து மகிஷாசுர மர்த்தினியாக அவதாரம் எடுத்து, மகிஷன் எனும் அரக்கனை அழிப்பதையே நவராத்திரி வரலாறு என்கிறார்கள்.

மகத்துவம்

நவராத்திரியின் முதல் மூன்று நாட்களும் வீரசக்தியின் தோற்றமான துர்க்கையின் ஆட்சிக் காலம். இதில் இறைவன் உலகத்தை வாழ்விக்க அருள்கின்றான்.

நடுவில் உள்ள மூன்று நாட்களும் செல்வசக்தியின் தோற்றமான லட்சுமியின் ஆட்சிக்காலம். இதில் இறைவன் ஆன்மாக்களுக்கு தனு, கரண, புவன போகங்களைக் கொடுக்கும் முறையை அருள்கின்றான்.

இறுதி மூன்று நாட்களும் கல்விசக்தியின் தோற்றமான சரஸ்வதியின் ஆட்சிக்காலம். இதில் இறைவன் முன் அறிந்தவாறு அருள் வழங்குகின்றான் என்பது சிவாகமத்தின் உள்ளுறையாகும்.

நவராத்திரி வழிபாட்டு முறை

நவராத்திரி விழாவன்று நவராத்திரி விரதம் எடுப்பவர்கள் அந்த ஒன்பது நாளும் ஒரு வேளை மட்டும் உணவு சாப்பிட்டு விரதத்தினை கடைப்பிடிக்க வேண்டும்.

நவராத்திரி விரதத்தினை எடுப்பவர்கள் திருமணம் ஆன பெண்களை தங்களது வீட்டிற்கு அழைத்து வந்து அவர்களைப் பராசக்தியாகப் பாவித்துக் கொலுவின் அருகில் அமர வைத்து வணங்கி மஞ்சள், குங்குமம், பட்டு, நாணயம், தாம்பூலம் போன்ற பொருள்களை கொடுக்கலாம்.

8-ம் நாளான நவராத்திரி அன்று 2 முதல் 10 வயதிற்குட்பட்ட குழந்தைகளை வீட்டிற்கு அழைத்து வந்து அவர்களை அம்மனின் அம்சமாக கருதி பொட்டு, வளையல், உணவு, இனிப்பு மற்றும் ஆடை கொடுத்துகுழந்தைகளை சந்தோஷப்படுத்தலாம்.

சிறப்பு ஒருவர் நவராத்திரியில் தன் வீட்டீலேயே மாபெரும் பிரபஞ்ச சக்தியையும் ஐம்பூத சக்திகளையும் தருவித்து தெய்வீகசக்தியை நிலைப்பெறச் செய்து, ஆனந்தமாக வாழ நினைத்தால் நவராத்திரி பூஜையை மேற்கொள்வது நல்லது.

Tuesday, September 20, 2022

திருக்கோணேஸ்வரத்துக்கு யாத்திரை செல்லுங்கள்..!!!

திருக்கோணேஸ்வரத்துக்கு யாத்திரை செல்லுங்கள்..!!!


திருகோணமலையிலுள்ள திருக்கோணேஸ்வரம் ஆலயம் தமிழர்கள் இந்த நாட்டின் மூத்த குடிகள் என்பதை எடுத்துரைக்கின்ற வரலாற்றுச் சான்றாதாரமாகும்.

தவிர, இலங்கை வேந்தன் இராவணேஸ்வரனால் அமைக்கப்பட்ட சிவனாலயம் என்பதும் இங்கு குறித்துரைக்கப்பட வேண்டிய விடயம்.

இற்றைக்கு 3000 ஆண்டுகளுக்கு முன்னர் வாழ்ந்த திருமூலர் ஈழ நாட்டைச் சிவபூமி என்று போற்றினார்.

அதனை மேலும் வலுப்படுத்துவதாகத் திருக்கோணேஸ்வரம் ஆலயத்தின் மீது நாயன்மார்கள் பாடிய தேவாரத் திருமுறைகள் அமைகின்றன.

எனினும் திருக்கோணேஸ்வரம் சிவனாலயத்தைச் சுற்றி பாதுகாப்புப் படையினர் முகாமிட்டிருப்பதனாலும் ஆலயத்துக்கு அடியவர்கள் செல்வதற்குப் படையினர் மிகுந்த கட்டுப்பாடுகளை - விதித்திருப்பதனாலும் கோணேஸ்வரத்துக்குச் செல்லுகின்ற அடியார்களின் எண்ணிக்கை மிகக் குறைவு எனலாம்.

உண்மையில் ஒரு பெரும் வரலாற்றுச் சிறப்புமிக்க ஆலயத்தின் கட்டுக்கோப்பைத் தீர்மானிப்பதில் அங்கு செல்லுகின்ற அடிய வர்களின் எண்ணிக்கை உயர்ந்த வகிபங்கை ஆற்றும் என்பது மறுதலிக்க முடியாத உண்மை. இதற்குத் தக்கசான்றுகள் உண்டு. திரு விழாக் காலங்களில் நல்லூர்க் கந்தசுவாமி கோயிலுக்குச் செல்லுகின்ற அடியவர்களின் எண்ணிக்கையைக் கண்டு, அங்கு கடமையில் இருக்கும் காவல்துறையினர் விறைத்துப் போவர்.

இத்துணை மக்கள் கூட்டம் எப்படி ஒரே நேரத்தில் ஒன்று சேர்ந்தது என்று அதிசயிப்பர் . இதையும் கடந்து , முருகன் மீது அடியவர் கள் கொண்டுள்ள பக்தி நிலையும் வெளிப்படுத்தப்படுகிறது.

இதேபோல் சிவராத்திரி விரதத்தில் மன்னார் திருக்கேதீஸ்வரம் ஆலயத்தில் கூடுகின்ற. இலட்சக்கணக்கான அடியவர்களால் , அந்த ஆலயத்தின் பாதுகாப்பு உறுதி செய்யப்படுகிறது.

ஆனால் துரதிர்ஷ்டவசமாக திருகோணமலை திருக்கோணேஸ்வரம் ஆலயத்துக்குச் செல்லுகின்ற அடியவர்களின் எண்ணிக்கை மிகக் குறைவாக இருப்பதால் , ஆலயத்தின் நிலப்பரப்பைக் கபளீகரம் செய்வதிலும் ஆலய வளாகத்தில் பௌத்த விகாரைகளை அமைப்பதிலும் பேரினவாத சக்திகள் தீவிரம் காட்ட, அதற்குத் தொல்லியல் திணைக்களமும் துணை போகிறது.

உண்மையில் தொன்மைமிகுந்த எமது வரலாற்றுத் தலங்களை பாதுகாக்க வேண்டு மாயின் , அதற்கான ஒரே வழி குறித்த ஆல யங்களுக்கு அடியவர்கள் சென்று வழிபடு வதை ஊக்குவிக்க வேண்டும் .

அந்த வகையில் இந்த நாட்டின் அனைத்துப் பாகங்களில் இருந்தும் அடியவர்கள் திருக்கோணேஸ்வரத்துக்குத் தல யாத்திரை மேற்கொள்வது அவசியம் . இத்தல யாத்திரையை சைவ அமைப்புகள் மற்றும் சைவத் தொண்டர்கள் ஊர்தோறும் ஏற்பாடு செய்ய வேண்டும்.

வலம்புரி ஆசிரியர் தலையங்கம் - 19.09.2022

Friday, September 9, 2022

செல்வச்சந்நிதி முருகன் ஆலய தேர்த்திருவிழா..!!!(Video)

செல்வச்சந்நிதி முருகன் ஆலய தேர்த்திருவிழா..!!!(Video)


ஈழத்தின் பிரசித்தி பெற்ற தொண்டைமனாறு ஸ்ரீ செல்வச்சந்நிதி முருகன் ஆலய வருடாந்த மஹோற்சவத்தின் தேர்த்திருவிழா இன்று மிகவும் பக்தி பூர்வமாக இடம் பெற்றது.

ஆயிரக்கணக்கான பக்தர்கள் புடைசூழ முருகப் பெருமான் தேரில் ஆரோகணித்து அடியவர்களுக்கு அருள் பாலித்தார்.

பலநூற்றுக்கணக்கான அடியவர்கள் அங்கப் பிரதட்சணம் செய்தும், அடியழித்தும் தங்கள் நேர்த்திக்கடன்களை நிறைவேற்றினர். பல்வேறு காவடிகளும் கந்தனை நோக்கி வந்த வண்ணமிருந்தன.

செல்வச்சந்நிதி ஆலயத்தின் வருடாந்த மஹோற்சவம் கடந்த மாதம் 27ம் திகதி சனிக்கிழமை கொடியேற்றத்துடன் ஆரம்பமானது.

நாளை சனிக்கிழமை காலை 9 மணிக்கு தீர்த்தத் திருவிழாவும் நாளை மாலை 6 மணிக்கு மௌனத் திருவிழாவும் செப்டம்பர் 11ம் திகதி பூக்காரர் பூசையும் இடம்பெறவுள்ளது.











Thursday, September 8, 2022

தொண்டைமானாறு  செல்வச்சந்நிதி முருகன் ஆலய சப்பறத் திருவிழா..!!!

தொண்டைமானாறு செல்வச்சந்நிதி முருகன் ஆலய சப்பறத் திருவிழா..!!!


யாழ்ப்பாணம் – தொண்டைமானாறு செல்வச்சந்நிதி முருகன் ஆலய சப்பறத்திருவிழா இன்று (08.09.2022) மாலை பக்திபூர்வமாக இடம்பெற்றது.










Wednesday, September 7, 2022

தெல்லிப்பழை ஸ்ரீ துர்க்காதேவி ஆலயதேர்த் திருவிழா..!!!(Video)

தெல்லிப்பழை ஸ்ரீ துர்க்காதேவி ஆலயதேர்த் திருவிழா..!!!(Video)


வரலாற்றுப் பிரசித்திபெற்ற யாழ்.தெல்லிப்பழை ஸ்ரீ துர்க்காதேவி ஆலய வருடாந்த மஹோற்சவப் பெருவிழாவின் தேர்த் திருவிழா இன்று புதன்கிழமை(07.9.2022) வெகுசிறப்பாக இடம்பெற்றது.

இன்று அதிகாலை தேர்த் திருவிழாவுக்கான கிரியைகள் ஆரம்பமானது. அதனைத் தொடர்ந்து கொடித்தம்பப் பூசை இடம்பெற்றது. இன்று காலை-7.30 மணியளவில் வசந்தமண்டபப் பூசை ஆரம்பமானது.

வசந்தமண்டபப் பூசை வழிபாடுகள் இடம்பெற்றதைத் தொடர்ந்து துர்க்கை அம்பாள் பட்டாடைகள் ஜொலி ஜொலிக்க, சர்வமங்கள ஆபரணங்கள் மினு மினுங்க அலங்கார நாயகியாக அழகிய பீடத்தில் உள்வீதியில் மெல்ல மெல்லத் திருநடனத்துடன் அசைந்தாடி வந்து காலை-9 மணியளவில் சித்திரத் தேரில் எழுந்தருளினாள்.

சித்திரத் தேர் தடையின்றி வீதி வலம் வர சேந்தனார் அருளிய திருப்பல்லாண்டு பண்ணுடன் ஓதப்பட்டது. தொடர்ந்து அபிராமிப் பட்டர் அருளிய அபிராமி அந்தாதியும் ஓதப்பட்டது. ஆலய முன்றலில் குவிக்கப்பட்டிருந்த சிதறுதேங்காய்களும் உடைக்கப்பட்டன.

விசேட தீபாராதனைகள் இடம்பெற்றதைத் தொடர்ந்து அடியவர்களின் அரோகராக் கோஷம் முழங்க காலை-09.30 மணியளவில் சித்திரத் தேர்ப் பவனி ஆரம்பமானது.

ஆண் அடியவர்களும், பெண் அடியவர்களும் இணைந்து வடம் தொட்டிழுத்தனர். சித்திரத் தேர் பவனியின் பின்னே 200 இற்கும் மேற்பட்ட ஆண் அடியவர்கள் அங்கப் பிரதட்சணம் செய்தும், 150 இற்கும் மேற்பட்ட மாதர்கள் அடியளித்தும் துர்க்கை அம்பாளை மெய்யுருக வழிபட்டனர்.

நூற்றுக்கும் மேற்பட்ட ஆண் அடியவர்கள் பறவைக் காவடிகள், தூக்குக் காவடிகள், சப்பாணிக் காவடி, செதில் காவடிகள் முதலான வகை வகையான காவடிகள் எடுத்தும் துர்க்கை அம்பாளின் அருள்வேண்டித் துதி செய்தனர். அத்துடன் மங்கையர்கள் பலரும் கற்பூரச் சட்டிகள் ஏந்தியும், பாற்காவடிகள் எடுத்தும் துர்க்கை அம்பாளை நாடி வரங்கள் வேண்டினர்.

சித்திரத் தேர்ப் பவனியின் பின்னால் பல அடியவர்கள் அம்பாளின் புகழைப் போற்றிப் பஜனை பாடியவாறு கலந்து கொண்டனர். இவ்வாறு பஜனை பாடிய அடியவர்களில் பலரும் திடீரெனத் தம்மை மறந்து பரவச நிலையில் ஆடிய காட்சி பக்திப் பரவசத்தைப் பறைசாற்றுவதாய் அமைந்திருந்தது.

சித்திரத் தேர் முற்பகல்-10 மணியளவில் மீண்டும் இருப்பிடத்தைச் சென்றடைந்ததைத் தொடர்ந்து பெருமளவான அடியவர்கள் அர்ச்சனை செய்தும் துர்க்கை அம்பாளை வழிபட்டனர். தேர்த் திருவிழாவை முன்னிட்டு ஆலயத்தின் தெற்குப் பக்கமாக அமைந்துள்ள திருமுறை மடத்தில் சிறப்புப் பண்ணிசைக் கச்சேரியும் ஏற்பாடு செய்யப்பட்டிருந்தது.

தேர்த் திருவிழாவில் கலந்து கொண்டிருந்த அடியவர்களை ஒழுங்குபடுத்தும் நடவடிக்கைகளில் தெல்லிப்பழை இந்து இளைஞர் சங்கத்தினர், ஆலயத் தொண்டர்கள், சாரணர்கள் உள்ளிட்டோர் ஈடுபட்டனர். தெல்லிப்பழைப் பொலிஸாரும் ஆலய வளாகத்தில் பாதுகாப்புக் கடமைகளில் ஈடுபட்டிருந்தனர்.

தேர்த் திருவிழாவை முன்னிட்டு மேற்படி ஆலய நிர்வாகசபையினரின் ஏற்பாட்டில் ஆலய மண்டபத்தில் அடியவர்களுக்கு விசேட அன்னதானம் ஒழுங்குபடுத்தப்பட்டிருந்தது. அதுமாத்திரமன்றி அடியவர்களின் தாகத்தைத் தீர்ப்பதற்காக ஆலயச் சூழலிலும், ஆலயத்திற்குச் செல்லும் வீதிகள் பலவற்றிலும் தாகசாந்தி நிலையங்கள் அமைக்கப்பட்டுக் குளிர்மைமிகு பானங்கள் பரிமாறப்பட்டன.

இன்றைய தேர்த் திருவிழாவில் யாழ்.மாவட்டத்தின் பல பாகங்களிலிருந்தும், வெளி மாவட்டங்களிலிருந்தும், புலம்பெயர் நாடுகளிலிருந்தும் வருகை தந்த பல்லாயிரக்கணக்கான அடியவர்கள் பக்திப் பெருக்குடன் கலந்து கொண்டிருந்தனர்.

துர்க்காதேவி ஆலயப் பிரதமகுரு சிவஸ்ரீ க. செந்தில்ராஜக் குருக்கள் தலைமையிலான சிவாச்சாரியார்கள் தேர்த் திருவிழாக் கிரியைகளை சிறப்பாக ஆற்றினர்.தேர்த் திருவிழாவை முன்னிட்டு ஆலயச் சூழல் விழாக் கோலம் பூண்டிருந்தது.

இதேவேளை, ஆவணி ஓண நன்னாளான நாளை வியாழக்கிழமை(08.9.2022) துர்க்கா புஷ்கரணி தீர்த்தக் கேணியில் காலை-8.30 மணியளவில் துர்க்கை அம்பாளின் தீர்த்தோற்சவமும், மாலை-06 மணியளவில் கொடியிறக்க உற்சவமும் சிறப்பாக நடைபெறும்.










Thursday, September 1, 2022

28 வருடங்களின் பின்னர் வசாவிளான் ஞானவைரவர் ஆலய மகா கும்பாபிஷேகம்..!!!

28 வருடங்களின் பின்னர் வசாவிளான் ஞானவைரவர் ஆலய மகா கும்பாபிஷேகம்..!!!


யாழ்ப்பாணம் வயாவிளான் தெற்கு ஞான வைரவர் ஆலய மகா கும்பாபிஷேகம் இன்றைய தினம் வியாழக்கிழமை காலை நடைபெற்றது.

இராணுவ நடவடிக்கை காரணமாக அப்பகுதியில் இருந்த மக்கள் வெளியேறிய நிலையில் இராணுவத்தினரின் உயர் பாதுகாப்பு வலயத்தினுள் 28 வருட காலமாக இருந்த கோயிலை விடுக்குமாறு பல தரப்பினரிடமும் ஆலய பக்தர்கள் கோரிக்கைகள் விடுத்து வந்தனர்.

இந்நிலையில் கடந்த 2018ஆம் ஆண்டு ஜூன் மாதம் 18ஆம் திகதி ஆலய பகுதியினை இராணுவத்தினர் விடுவித்து தமது உயர்பாதுகாப்பு வலய வேலியினை பின் நகர்த்தினார்.

அதனை அடுத்து முற்றாக சேதமடைந்த ஆலயத்தினை மீள் நிர்மாணம் செய்வதற்குள் ஆலய பரிபாலன முயற்சிகளை முன்னெடுத்து , உள்ளூர் மற்றும் புலம்பெயர்ந்தோர்களின் நிதி பங்களிப்பு , ஆதரவுடன் ஆலயத்தினை இராஜ கோபுரத்துடன் புனர்நிர்மாணம் செய்தனர்.

இந்நிலையில் இன்றைய தினம் வியாழக்கிழமை காலை 7.09 மணி முதல் 09.04 மணி வரையிலான கன்னி லக்கின சுபமுகூர்த்தத்தில் மகா கும்பாபிஷேகம் நடைபெற்றது.

கும்பாபிஷேகத்தின் போது கடும் மழை பொழிந்த போதிலும் பெருமளவான பக்தர்கள் கலந்து கொண்டு வைரவ பெருமானை வணங்கி அருளாசியினை பெற்றுக்கொண்டனர்.