21 ஆண்டுகளுக்கு முன்னர் என் வாழ்க்கையை மாற்றிய நாள் செப்டெம்பர் 30 என த்ரிஷா தெரிவித்துள்ளார்.
த்ரிஷா கடந்த 1999மஆம் ஆண்டு நடந்த மிஸ் சென்னை அழகிப் போட்டியில் கலந்து கொண்டு பட்டம் வென்றார். அதே ஆண்டு அவர் பிரசாந்த், சிம்ரன் நடித்த ஜோடி படம் மூலம் கோலிவுட்டில் அறிமுகம் ஆனார். ஜோடி படத்தில் சிம்ரனின் தோழியாக நடித்திருந்தார் த்ரிஷா.
அதன் பிறகு சூர்யாவின் மௌனம் பேசியதே படம் மூலம் ஹீரோயின் ஆனார். அந்த படம் சரியாக போகாத நிலையில் அவர் ஸ்ரீகாந்துடன் சேர்ந்து நடித்த மனசெல்லாம் படமும் தோல்வி அடைந்தது. இதனால் மனமுடைந்த த்ரிஷாவுக்கு விக்ரம் ஜோடியாக சாமி படத்தில் நடிக்கும் வாய்ப்பு கிடைத்தது. சாமி படமும் ஓடவில்லை என்றால் சினிமாவில் இருந்து விலகிவிடலாம் என்று த்ரிஷா முடிவு செய்திருந்தார். ஆனால் சாமி படம் சூப்பர் டூப்பர் ஹிட்டானதுடன் த்ரிஷாவின் கதாபாத்திரம் பெரிய அளவில் பேசப்பட்டது. அதன் பிறகு அவர் தொடர்ந்து படங்களில் நடிப்பது என்று முடிவு செய்தார்.
த்ரிஷா நடிக்க வந்து 21 ஆண்டுகள் ஆகிவிட்டது. இந்நிலையில் அவர் தான் மிஸ் சென்னை பட்டம் வென்றபோது எடுக்கப்பட்ட புகைப்படத்தை ட்விட்டரில் வெளியிட்டு, இந்த நாள் என் வாழ்க்கையை மாற்றியது என்று தெரிவித்துள்ளார்.
த்ரிஷாவின் புகைப்படத்தை பார்த்தவர்கள், அப்பொழுது இருந்தபடியே தான் தற்போதும் இருக்கிறீர்கள். உங்கள் அழகின் ரகசியம் என்ன என்று கேட்டுள்ளனர்.
த்ரிஷாவின் கெரியர் டல் அடித்த நிலையில் தான் அவருக்கு விஜய் சேதுபதியுடன் சேர்ந்து 96 படத்தில் நடிக்கும் வாய்ப்பு கிடைத்தது. அந்த படத்தை பார்த்தவர்கள் த்ரிஷா, ஜானுவாக நடிக்கவில்லை மாறாக அந்த கதாபாத்திரமாகவே வாழ்ந்திருந்தார் என்று பாராட்டினார்கள். 96 படத்தில் சிறப்பான நடிப்பை வெளிப்படுத்தியதற்காக த்ரிஷாவுக்கு விருதுகள் கிடைத்தது.
96 படத்தை இயக்கிய பிரேம் குமார் அதை தெலுங்கில் சமந்தா, சர்வானந்த் ஆகியோரை வைத்து ஜானு என்கிற பெயரில் ரீமேக் செய்தார். ஆனால் ஜானுவுக்கு பெரிதாக வரவேற்பு கிடைக்கவில்லை. படத்தை பார்த்தவர்கள் த்ரிஷா அளவுக்கு சமந்தா தத்ரூபமாக நடிக்கவில்லை, ஓவர் ஆக்டிங் செய்துவிட்டார் என்று விமர்சித்தார்கள்.
த்ரிஷா மணிரத்னம் இயக்கத்தில் பொன்னியின் செல்வன் படத்தில் நடிக்கிறார். படப்பிடிப்பே இன்னும் முடியாத நிலையில் அந்த படத்திற்கு பெரிதும் எதிர்பார்ப்பு ஏற்பட்டுள்ளது.
