கமல்ஹாசனின் ராஜ் கமல் நிறுவன தயாரிப்பில் லோகேஷ் கனகராஜ் இயக்கத்தில் சிம்பு நடிக்கவிருப்பதாக தகவல் வெளியாகியுள்ளது.
லாக்டவுனுக்கு முன்பு சிம்பு வெங்கட் பிரபு இயக்கத்தில் மாநாடு படத்தில் நடித்து வந்தார். மாநாடு படத்தின் ஷூட்டிங் முன்பே துவங்க வேண்டியது. ஆனால் பிரச்சனை ஏற்படவே தயாரிப்பாளர்கள் சங்கம் வரை பஞ்சாயத்து சென்றது.
பஞ்சாயத்து கூட்டத்தில் கலந்து கொண்ட உஷா ராஜேந்தர் தன் மகன் சிம்பு சரியான நேரத்திற்கு வந்து படத்தில் நடிப்பார் என்று வாக்குறுதி அளித்தார். அதன் பிறகே மாநாடு படப்பிடிப்பு துவங்கி விறுவிறுப்பாக நடந்து வந்தது. ஆனால் கொரோனா வைரஸ் பிரச்சனை விஸ்வரூபம் எடுக்கவே படப்பிடிப்பை நிறுத்தி வைத்தனர்.
மீண்டும் படப்பிடிப்புகளை துவங்கலாம் என்று மத்திய, மாநில அரசுகள் அண்மையில் அனுமதி அளித்தன. ஆனால் மாநாடு படப்பிடிப்பு இன்னும் துவங்கவில்லை. இந்நிலையில் சிம்பு சுசீந்திரன் இயக்கத்தில் ஒரு படத்தில் நடிக்கப் போகிறாராம். அதுவும் மாநாடு படப்பிடிப்புக்கு முன்பு சிம்பு சுசீந்திரன் படப்பிடிப்பில் தான் கலந்து கொள்கிறாராம்.
இது என்னய்யா மாநாடுக்கு வந்த சோதனை என்று ரசிகர்கள் கவலைப்பட்டனர். இந்நிலையில் சிம்பு லோகேஷ் கனராஜ் இயக்கத்தில் நடிக்கப் போகிறாராம்.
கமல் ஹாசனின் ராஜ் கமல் தயாரிப்பு நிறுவனத்திற்கு இரண்டு படங்களை இயக்குவதாக ஒப்பந்தத்தில் கையெழுத்திட்டுள்ளார் லோகேஷ் கனகராஜ். அவர் ரஜினியை வைத்து இயக்க அந்த படத்தை கமல் தயாரிப்பார் என்று கூறப்பட்டது. ஆனால் அந்த படம் கைகூடவில்லை. இதையடுத்து லோகேஷ் கமல் ஹாசனை வைத்து படம் எடுக்கிறார்.
கமல் படத்தை முடித்த கையோடு ராஜ் கமல் நிறுவனத்திற்காக சிம்புவை வைத்து படம் எடுக்கப் போகிறாராம் லோகேஷ். இந்த படம் தொடர்பாக கமல் கடந்த வாரம் சிம்புவுடன் பேச்சுவார்த்தை நடத்தினாராம்.
சிம்புவும் லோகேஷ் இயக்கத்தில் நடிக்க ஆர்வமாக இருப்பதாக கூறினாராம். இதையடுத்து லோகேஷை அனுப்பி சிம்புவுக்கு கதை சொல்ல முடிவு செய்திருக்கிறாராம் கமல்.
சுசீந்திரன், லோகேஷ் கனராஜ் என அடுத்தடுத்து புதுப்படங்களில் நடிக்க ஒப்புக் கொண்டுள்ளார் சிம்பு. இதற்கிடையே மாநாடு படத்தில் எப்பொழுது நடிப்பார் என்று பலரும் கேள்வி எழுப்பியுள்ளனர்.
சிம்புவும், கமலும் சேர்ந்து சிகப்பு ரோஜாக்கள் படத்தின் இரண்டாம் பாகத்தில் நடிக்கக்கூடும் என்று கூறப்பட்டது. இந்நிலையில் சிம்பு கமல் தயாரிப்பில் நடிக்கவிருக்கிறார்.
