பல்கலைக்கழக மாணவன் உயிரிழப்பு..!!!

வவுனியாப் பல்கலைக்கழகத்தின் தகவல் தொழில்நுட்ப பீடத்தில் கல்வி பயின்று வந்த மாணவன் ஒருவர் திடீரென உயிரிழந்த சம்பவம் தொடர்பில், பூவரசங்குளம் பொலிஸார் விசாரணைகளை ஆரம்பித்துள்ளதாகத் தெரிவிக்கப்பட்டுள்ளது.

அனுராதபுரம் ஜயசிறிபுர பகுதியைச் சேர்ந்த 23 வயதுடைய குறித்த மாணவன், கடந்த ஒக்டோபர் மாதம் 31ஆம் திகதி இரவு திடீர் சுகயீனம் காரணமாக மருத்துவமனையில் அனுமதிக்கப்பட்ட பின்னர் உயிரிழந்துள்ளார்.

சம்பவம் தொடர்பில் உயிரிழந்த மாணவனின் உறவினர்கள், அவரது திடீர் மரணத்திற்குப் பகிடிவதையே (Ragging) காரணம் எனக் குற்றம் சாட்டியுள்ளனர். இதன் காரணமாக, அப்பகுதியில் பதட்டமான சூழல் நிலவுகிறது.

மாணவனின் திடீர் மரணம் குறித்து பூவரசங்குளம் காவல்துறையினர் வழக்குப்பதிவு செய்து விசாரணைகளை முன்னெடுத்துள்ளனர். மாணவரின் உயிரிழப்புக்கான சரியான மற்றும் உரிய காரணம், சடலத்தின் பிரேத பரிசோதனையின் பின்னரான விசாரணையின் முடிவிலேயே வெளிப்படுத்தப்படும் என்றும் பொலிஸார் குறிப்பிட்டுள்ளனர்.

பல்கலைக்கழக மாணவர்களின் பகிடிவதை தொடர்பான சர்ச்சைகள் ஏற்கெனவே நிலவி வரும் நிலையில், இந்தக் குற்றச்சாட்டு மிகுந்த முக்கியத்துவம் வாய்ந்ததாகக் கருதப்படுகிறது.