பால் மாவின் விலை அதிகரிப்பு..!!!

நாட்டின் தற்போதைய பொருளாதார நிலைமைகள் மற்றும் அமெரிக்க டொலருக்கு நிகரான இலங்கை ரூபாவின் வீழ்ச்சி காரணமாக, இறக்குமதி செய்யப்படும் பால்மாவின் விலை அதிகரிக்கப்பட்டுள்ளதாக பால்மா இறக்குமதியாளர்கள் சங்கம் அறிவித்துள்ளது.

இறக்குமதி செலவுகள் மற்றும் நாணய மாற்று விகிதங்களில் ஏற்பட்டுள்ள மாற்றங்களைக் கருத்திற்கொண்டு பால்மாவின் விலைகளை அதிகரிக்க வேண்டியேற்பட்டுள்ளதாக பால்மா இறக்குமதியாளர்கள் சங்கம் தெரிவித்துள்ளது. இதற்கமைய, 400 கிராம் பால்மா பாக்கெட்டின் விலை 50 ரூபாவினாலும், 1 கிலோகிராம் பால்மா பாக்கெட்டின் விலை 125 ரூபாவினாலும் அதிகரிக்கப்பட்டுள்ளது. இந்த விலை திருத்தமானது நேற்று புதன்கிழமை முதல் பொதி செய்யப்படும் பால்மா பாக்கெட்டுகளுக்குப் பொருந்தும் என அச்சங்கம் மேலும் குறிப்பிட்டுள்ளது.

இதேவேளை, இலங்கை ரூபாவின் தொடர்ச்சியான வீழ்ச்சி மற்றும் அமெரிக்க டொலரின் பெறுமதி உயர்வு காரணமாக, வரும் வாரங்களில் மேலும் பல அத்தியாவசிய இறக்குமதிப் பொருட்களின் விலைகள் அதிகரிக்கக்கூடும் என அத்தியாவசிய உணவுப் பொருட்கள் இறக்குமதியாளர்கள் சங்கம் எச்சரித்துள்ளது.

இது தொடர்பாக ஊடகங்களுக்கு கருத்து தெரிவித்துள்ள சங்கத்தின் செயலாளர் பி. சுப்பிரமணியம், நாணய மாற்று விகிதங்களில் ஏற்படும் ஏற்ற இறக்கங்கள் அத்தியாவசியப் பொருட்களின் இறக்குமதி செலவை நேரடியாகப் பாதிப்பதாகக் குறிப்பிட்டுள்ளார். இதன் காரணமாக, நுகர்வோர் அன்றாடம் பயன்படுத்தும் சீனி, பருப்பு மற்றும் அரிசி உள்ளிட்ட பல அத்தியாவசிய உணவுப் பொருட்களின் விலைகள் எதிர்காலத்தில் மேலும் அதிகரிக்க வாய்ப்புள்ளதாக அவர் சுட்டிக்காட்டியுள்ளார்.