வாய் சுகாதாரம் என்பது அனைவருக்கும் மிகவும் முக்கியமானது. பெரும்பாலான மக்கள் பற்களை பராமரிப்பது மட்டுமே வாய் சுகாதாரம் என்று எண்ணுகின்றனர். நாக்கினை பற்றி யோசிக்க மறந்து விடுகின்றனர்.
ஆனால், நாக்கின் மூலமும் துர்நாற்றம் மற்றும் சில ஆரோக்கிய குறைப்பாடுகள் ஏற்படும். உங்கள் வாயில் உள்ள மோசமான பாக்டீரியாக்கள், உணவின் குப்பைகள் மற்றும் இறந்த செல்களை நீக்க நீங்கள் தினமும் நாக்கை சுத்தம் செய்வது முக்கியம். பாக்டீரியா, பூஞ்சை, இறந்த செல்கள் கூட உங்களின் வாய் துர்நாற்றத்துக்கு காரணமாக இருக்கும்.
நாக்கின் சுகாதாரத்தை பராமரிப்பதன் மூலம் உங்களுக்கு கிடைக்கும் ஆரோக்கிய நன்மைகள் பற்றித் தெரிந்து கொள்வோம் வாங்க.
ஒவ்வொரு நாளும் இரண்டு முறை நாக்கினை சுத்தம் செய்வதன் மூலம் உங்களின் சுவை உணர்வை மேம்படுத்தலாம். நாக்கை சுத்தம் செய்வதால் நாக்கில் உள்ள இறந்த செல்கள் மற்றும் பிற தேவையற்ற பொருட்கள் நீக்கப்படும்.
இதனால் நாக்கில் உள்ள சுவை மொட்டுகள், நீங்கள் உண்ணும் உணவின் சுவையை சிறந்ததாகக் காட்டும். அதேபோல், கசப்பு, இனிப்பு, உப்பு மற்றும் புளிப்பு உணர்வுகளை சிறப்பாக வேறுபடுத்திக் காட்டும். மேலும், பல் சிதைவு மற்றும் வாய் துர்நாற்றத்துக்கு வழி செய்யும் கெட்ட பாக்டீரியாக்களை நாக்கை சுத்தப்படுத்துவதன் மூலம் நீக்க முடியும்.
அதேபோல் தினமும் நாக்கை சுத்தம் செய்வதால் உங்கள் வாயில் உள்ள நல்ல பாக்டீரியாக்களின் சமநிலையை பராமரிக்க முடியும். இதையட்த்து, உணவை செரிமானம் என்பது உங்கள் வாயிலிருந்து தான் தொடங்குகிறது.
நம் உமிழ்நீரில் உள்ள நொதிகள் மூலம் குடல் உணவை எளிதில் செரிமானம் செய்யும். நாம் தினமும் நாக்கை சுத்தம் செய்யும் போது, உமிழ்நீரில் உள்ள நொதிகள் சிறப்பாக செயல்படும். இதனால் செரிமானமும் சிறந்ததாக இருக்கும். காலையில் பல் துலக்கும் போது, நாக்கினையும் சுத்தம் செய்ய வேண்டும்.
இதனால் இரவு முழுவதும் உங்கள் வாயில் சேர்ந்து இருக்கும் நச்சுக்களை நீக்க முடியும். அதேபோல் நாக்கை சுத்தம் செய்யும் போது உட்புற உறுப்புகள் மெதுவாக செயல்படத் துவங்கும். அதுமட்டுமின்றி, இது உங்கள் நாளை புதியதாகவும், சுத்தமாகவும் உணரச் செய்யும்.
மேலும், நம் வாயில் உள்ள இறந்த செல்கள், பாக்டீரியா அல்லது உணவுத் துகள்கள் தான் வாய் துர்நாற்றத்திற்கு வழி வகுக்கும். நாக்கை சுத்தம் செய்வது என்பது வாய் வழி சுகாதாரத்தை மேம்படுத்தும் ஒரு முறை தான் என்றாலும், இதன் மூலம் உங்களின் நோய் எதிர்ப்பு சக்தியை அதிகரிக்க முடியும்.
ஆம், இது உண்மை தான். உங்கள் வாயில் நச்சுகள் மற்றும் கெட்ட பாக்டீரியாக்கள் உங்களின் நோய் எதிர்ப்பு சக்தியை பலவீனமாக்கும். அதனைத் தடுக்க நாம் தினமும் நாக்கை சுத்தம் செய்ய வேண்டும். ஏனெனில், நாக்கை சுத்தம் செய்வதால் கெட்ட பாக்டீரியாக்கள் அழியும். இதனால் நோய் எதிர்ப்பு மண்டலம் பலவீனமடைவது குறைந்து வலு பெறும்.
